ഖത്തറിലെ ഏറ്റവും വലിയ ഫുട്ബോൾ മാമാങ്കമായ അമീർ കപ്പിന്റെ 54-ാമത് എഡിഷൻ ഫൈനൽ മെയ് 9-ന് ദോഹയിലെ ഖലീഫ ഇന്റർനാഷണൽ സ്റ്റേഡിയത്തിൽ നടക്കുമെന്ന് ഖത്തർ ഫുട്ബോൾ അസോസിയേഷൻ (QFA) അറിയിച്ചു. ഈ വർഷം നടന്ന പ്രീക്വാർട്ടർ മത്സരങ്ങൾക്ക് ശേഷം അൽ ഗറാഫ, ഉമ്മു സലാൽ, അൽ റയ്യാൻ, അൽ വക്ര, അൽ ഷമാൽ, അൽ സദ്ദ്, അൽ ദുഹൈൽ, അൽ അറബി എന്നീ 8 ടീമുകളാണ് മെയ് 1 മുതൽ 8 വരെ നടക്കുന്ന ക്വാർട്ടർ, സെമി ഫൈനലുകൾക്ക് യോഗ്യത നേടിയിട്ടുള്ളത്.
ടിക്കറ്റ് വിവരങ്ങൾ:
മത്സരത്തിനായുള്ള ടിക്കറ്റുകൾ മെയ് 2 മുതൽ www.qfa.qa എന്ന ഔദ്യോഗിക വെബ്സൈറ്റ് വഴി സ്വന്തമാക്കാം. ഒരാൾക്ക് പരമാവധി 6 ടിക്കറ്റുകൾ വരെയാണ് വാങ്ങാൻ സാധിക്കുക. ഓൺലൈനായി വാങ്ങുന്ന ടിക്കറ്റുകൾ മെയ് 7 മുതൽ 'Road to Qatar' മൊബൈൽ ആപ്പിൽ ലഭ്യമാകും.
- കാറ്റഗറി 1 (CAT 1): 50 QAR
- കാറ്റഗറി 2 (CAT 2): 30 QAR
- കാറ്റഗറി 3 (CAT 3): 10 QAR
- ആക്സസിബിലിറ്റി ടിക്കറ്റ്: 10 QAR (ഇതിനായി accessibility.tickets@sc.qa എന്ന ഇമെയിലിൽ ബന്ധപ്പെടാം).
ഫൈനൽ മത്സരത്തിനെത്തുന്ന കാണികൾക്കായി സ്റ്റേഡിയത്തിലെ ഫാൻ സോണിൽ വിപുലമായ വിനോദ-സാംസ്കാരിക പരിപാടികളും ഒരുക്കുന്നുണ്ട്. 2022-ലെ ഫിഫ ലോകകപ്പിന് വേദിയായ ഖലീഫ ഇന്റർനാഷണൽ സ്റ്റേഡിയത്തിന്റെ അൻപതാം വാർഷികം കൂടിയാണ് ഈ വർഷം എന്ന പ്രത്യേകതയുമുണ്ട്. 1976-ലായിരുന്നു ഈ സ്റ്റേഡിയം ഉദ്ഘാടനം ചെയ്യപ്പെട്ടത്.
