വിമാന സർവീസുകൾ താൽക്കാലികമായി നിർത്തിവെച്ചിരിക്കുകയാണെങ്കിലും, ഇന്ന് മുതൽ (മാർച്ച് 5) പരിമിതമായ എണ്ണം റിലീഫ് ഫ്ലൈറ്റുകൾ സർവീസ് നടത്തുമെന്ന് ഖത്തർ എയർവേയ്‌സ് അറിയിച്ചു. മേഖലയിലെ നിലവിലെ സാഹചര്യങ്ങളെ തുടർന്ന് വിവിധയിടങ്ങളിൽ കുടുങ്ങിക്കിടക്കുന്ന യാത്രക്കാരെ സഹായിക്കുന്നതിനായാണ് ഈ അടിയന്തര നടപടി.
താഴെ പറയുന്ന റൂട്ടുകളിലാണ് റിലീഫ് സർവീസുകൾ ക്രമീകരിച്ചിരിക്കുന്നത്:
- മസ്‌കറ്റിൽ നിന്ന് ലണ്ടൻ ഹീത്രോ, ബെർലിൻ, കോപ്പൻഹേഗൻ, മാഡ്രിഡ്, റോം, ആംസ്റ്റർഡാം എന്നിവിടങ്ങളിലേക്ക്.
- റിയാദിൽ നിന്ന് ഫ്രാങ്ക്ഫർട്ടിലേക്ക്.
ഖത്തർ എയർവേയ്‌സിൽ നിന്ന് ഔദ്യോഗിക അറിയിപ്പ് ലഭിക്കാതെ യാത്രക്കാർ ഒരു കാരണവശാലും വിമാനത്താവളത്തിലേക്ക് പോകരുതെന്ന് വിമാനക്കമ്പനി കർശന നിർദ്ദേശം നൽകിയിട്ടുണ്ട്. യാത്ര സംബന്ധിച്ച വിവരങ്ങളും നിർദ്ദേശങ്ങളും കൃത്യമായി ലഭിക്കുന്നതിനായി യാത്രക്കാർ തങ്ങളുടെ ഫോൺ നമ്പർ ഉൾപ്പെടെയുള്ള വിവരങ്ങൾ (Contact details) അപ്ഡേറ്റ് ചെയ്തിട്ടുണ്ടെന്ന് ഉറപ്പുവരുത്തണം. യാത്ര മുടങ്ങിയവരെ എയർലൈൻ നേരിട്ട് ബന്ധപ്പെട്ട് വിവരങ്ങൾ നൽകുന്നതാണ്.
ഖത്തർ സിവിൽ ഏവിയേഷൻ അതോറിറ്റി വ്യോമപാത സുരക്ഷിതമായി തുറക്കുന്നതായി പ്രഖ്യാപിക്കുന്ന മുറയ്ക്ക് മാത്രമേ സാധാരണ സർവീസുകൾ പുനരാരംഭിക്കുകയുള്ളൂ. ഇതുസംബന്ധിച്ച കൂടുതൽ വിവരങ്ങൾ നാളെ (മാർച്ച് 6, 2026) അറിയിക്കുമെന്നും, സാഹചര്യങ്ങൾ നിരന്തരം നിരീക്ഷിച്ചുവരികയാണെന്നും ഖത്തർ എയർവേയ്‌സ് വ്യക്തമാക്കി.
