ഖത്തറിലെ സർക്കാർ സ്കൂളുകളിലെ പുതിയ വേനൽക്കാല സമയക്രമം വിദ്യാഭ്യാസ-ഉന്നത വിദ്യാഭ്യാസ മന്ത്രാലയം പ്രഖ്യാപിച്ചു. ഏപ്രിൽ 27-ന് പുറത്തിറക്കിയ അറിയിപ്പ് പ്രകാരം, 2026 മെയ് 3 മുതൽ ജൂൺ 3 വരെയാണ് ഈ പുതിയ സമയക്രമം ബാധകമാവുക. വേനൽച്ചൂട് കനക്കുന്ന സാഹചര്യത്തിൽ വിദ്യാർത്ഥികൾക്ക് ആശ്വാസമേകാനാണ് ഈ മാറ്റം.
പുതിയ സമയക്രമമനുസരിച്ച് കിന്റർഗാർട്ടൻ (പ്രീ-കെ ഉൾപ്പെടെ) വിദ്യാർത്ഥികൾക്ക് ഞായർ മുതൽ വ്യാഴം വരെ രാവിലെ 7 മണി മുതൽ ഉച്ചയ്ക്ക് 12 മണി വരെയായിരിക്കും ക്ലാസുകൾ. പ്രൈമറി വിഭാഗത്തിന് രാവിലെ 7 മുതൽ ഉച്ചയ്ക്ക് 12:30 വരെ പ്രവർത്തിക്കും. പ്രിപ്പറേറ്ററി വിഭാഗം വിദ്യാർത്ഥികൾക്ക് ദിവസവും രാവിലെ 7 മണിക്ക് ക്ലാസുകൾ തുടങ്ങും. ഇവർക്ക് ഞായർ മുതൽ ബുധൻ വരെ ഉച്ചയ്ക്ക് 12:45-നും, വ്യാഴാഴ്ചകളിൽ 12:30-നുമാണ് ക്ലാസുകൾ അവസാനിക്കുക. സെക്കൻഡറി വിഭാഗം വിദ്യാർത്ഥികൾക്ക് ഞായർ മുതൽ വ്യാഴം വരെ രാവിലെ 7 മണി മുതൽ 12:45 വരെയായിരിക്കും പ്രവൃത്തിസമയം. അതേസമയം, സർക്കാർ സ്കൂളുകളിലെ അധ്യാപകർക്കും മറ്റ് ഭരണനിർവ്വഹണ ജീവനക്കാർക്കും (administrative staff) ഞായറാഴ്ച മുതൽ വ്യാഴാഴ്ച വരെ രാവിലെ 7 മണി മുതൽ ഉച്ചയ്ക്ക് 1:15 വരെയായിരിക്കും ജോലി സമയമെന്നും മന്ത്രാലയം വ്യക്തമാക്കിയിട്ടുണ്ട്.
