വിശുദ്ധ റമദാൻ മാസത്തെ വരവേൽക്കാനായി 'വിസിറ്റ് ഖത്തർ' (Visit Qatar) 2026-ലെ റമദാൻ ക്യാമ്പയിൻ ആരംഭിച്ചു. "ഖത്തർ, റമദാനിൽ നിങ്ങളുടെ വീട്" (Qatar, Your Home in Ramadan) എന്ന പ്രമേയത്തിലാണ് ഈ വർഷത്തെ ക്യാമ്പയിൻ സംഘടിപ്പിക്കുന്നത്.
സ്വദേശികളെയും പ്രവാസികളെയും വിനോദസഞ്ചാരികളെയും ഒരുപോലെ ആകർഷിക്കുന്ന രീതിയിലാണ് പരിപാടികൾ ആസൂത്രണം ചെയ്തിരിക്കുന്നത്. റമദാനിന്റെ മഹത്തായ മൂല്യങ്ങളായ ആതിഥ്യമര്യാദ, ഉദാരത, ഒത്തൊരുമ എന്നിവ ഉയർത്തിക്കാട്ടുന്നതിനൊപ്പം, ഖത്തറിനെ എല്ലാവർക്കും സ്വാഗതം നൽകുന്ന ഒരു 'വീട്' പോലെ അനുഭവവേദ്യമാക്കുക എന്നതാണ് ഇതിന്റെ ലക്ഷ്യം.
രാജ്യത്തുടനീളം വിസ്മയിപ്പിക്കുന്ന ദീപാലങ്കാരങ്ങൾ ഒരുക്കും എന്നതാണ് ഈ ക്യാമ്പയിന്റെ പ്രധാന സവിശേഷത. തെരുവുകളും പ്രധാന കെട്ടിടങ്ങളും പൊതുസ്ഥലങ്ങളും റമദാൻ വിളക്കുകളാൽ അലങ്കരിക്കും. ഇത് നഗരത്തിലുടനീളം റമദാനിന്റെ ചൈതന്യം നിറയ്ക്കും.
ക്യാമ്പയിന്റെ ഭാഗമായി പുതിയൊരു സംഗീത ആവിഷ്കാരവും വിസിറ്റ് ഖത്തർ പുറത്തിറക്കിയിട്ടുണ്ട്. പ്രശസ്ത ഖത്തരി ഗായകൻ ഫഹദ് അൽ ഹജ്ജാജിയും അന്താരാഷ്ട്ര താരം മഹർ സൈനും ചേർന്നാണ് ഈ ഗാനം ആലപിച്ചിരിക്കുന്നത്. മഹർ സൈൻ ഇതിലെ ഇംഗ്ലീഷ് ഭാഗങ്ങളാണ് ആലപിച്ചിട്ടുള്ളത്.
