ഖത്തർ പൊതുമരാമത്ത് അതോറിറ്റിയായ അഷ്ഗാൽ (Ashghal), നാഗ അൽ സഹ്ല സ്ട്രീറ്റിൽ (Naga Al Sahla Street) താത്കാലിക ഗതാഗത നിയന്ത്രണം പ്രഖ്യാപിച്ചു. ഗരാഫത്ത് അൽ റയ്യാൻ സ്ട്രീറ്റിൽ നിന്ന് ബാനി ഹാജർ ഭാഗത്തേക്ക് പോകുന്ന വാഹനങ്ങൾക്കാണ് നിയന്ത്രണം ബാധകമാവുക. 2026 ജനുവരി 31 ശനിയാഴ്ച പുലർച്ചെ 2 മണി മുതൽ രാവിലെ 7 മണി വരെ അഞ്ച് മണിക്കൂർ നേരത്തേക്കാണ് റോഡ് അടച്ചിടുക. ജനറൽ ഡയറക്ടറേറ്റ് ഓഫ് ട്രാഫിക്കുമായി സഹകരിച്ചാണ് ഈ ക്രമീകരണം ഏർപ്പെടുത്തിയിരിക്കുന്നത്.
ഗതാഗത നിയന്ത്രണമുള്ള സമയത്ത് ഗരാഫത്ത് അൽ റയ്യാൻ സ്ട്രീറ്റിലൂടെ വരുന്ന യാത്രക്കാർ, ബൊളിവാർഡ് സ്ട്രീറ്റിലെ ഗരാഫത്ത് അൽ റയ്യാൻ ഇൻ്റർചേഞ്ച് വഴി ബാനി ഹാജർ ഇൻ്റർചേഞ്ചിലെത്തി, അൽ ഷഹാമ സ്ട്രീറ്റിലൂടെ (Al Shahama Street) ലക്ഷ്യസ്ഥാനത്തേക്ക് പോകണമെന്ന് അഷ്ഗാൽ നിർദ്ദേശിച്ചു. യാത്രക്കാരുടെ സുരക്ഷ ഉറപ്പാക്കുന്നതിനായി റോഡിൽ സ്ഥാപിച്ചിട്ടുള്ള ട്രാഫിക് അടയാളങ്ങളും വഴിതിരിച്ചുവിടൽ നിർദ്ദേശങ്ങളും പാലിക്കണമെന്ന് അധികൃതർ അഭ്യർത്ഥിച്ചു.
