അൽ ബാദി ഇന്റർചേഞ്ചിൽ (Al Badi Interchange) എല്ലാ ദിശകളിലേക്കുമുള്ള ഗതാഗതത്തിന് താത്കാലിക നിയന്ത്രണം ഏർപ്പെടുത്തിയതായി പൊതുമരാമത്ത് അതോറിറ്റിയായ അഷ്ഗാൽ (Ashghal) അറിയിച്ചു. 2026 ഏപ്രിൽ 12 ഞായറാഴ്ച മുതൽ മെയ് 29 വെള്ളിയാഴ്ച രാവിലെ 10 മണി വരെ ആറാഴ്ചത്തേക്കാണ് റോഡ് പൂർണ്ണമായും അടച്ചിടുന്നത്. മലിനജല പൈപ്പ് ലൈനുമായി (sewage pipeline) ബന്ധപ്പെട്ട് നടക്കുന്ന അറ്റകുറ്റപ്പണികളുടെ ഭാഗമായാണ് ഈ നിയന്ത്രണമെന്ന് അഷ്ഗാൽ തങ്ങളുടെ ഔദ്യോഗിക സോഷ്യൽ മീഡിയ പേജിലൂടെ വ്യക്തമാക്കി.
ഗതാഗത നിയന്ത്രണമുള്ള സമയത്ത് ലക്ഷ്യസ്ഥാനങ്ങളിലെത്താൻ യാത്രക്കാർ ലഭ്യമായ മറ്റ് ലെയ്നുകളോ മാപ്പിൽ സൂചിപ്പിച്ചിട്ടുള്ള ബദൽ റോഡുകളോ ഉപയോഗിക്കണം. ഈ മേഖലയിലൂടെ യാത്ര ചെയ്യുന്നവർ നിർബന്ധമായും ട്രാഫിക് അടയാളങ്ങൾ ശ്രദ്ധിക്കുകയും വേഗപരിധി കർശനമായി പാലിക്കുകയും ചെയ്യുക. അറ്റകുറ്റപ്പണികൾ നടക്കുന്ന പ്രദേശത്ത് സുഗമമായ ഗതാഗതം ഉറപ്പാക്കാനും, എല്ലാവരുടെയും സുരക്ഷയ്ക്കുമായി ഡ്രൈവർമാർ പ്രത്യേക ജാഗ്രത പാലിക്കണമെന്നും അധികൃതർ അഭ്യർത്ഥിച്ചിട്ടുണ്ട്.
