ഖത്തറിൽ ഈ വീകെൻറ്റിൽ ഇടിമിന്നലോടു കൂടിയ മഴയ്ക്കും ശക്തമായ കാറ്റിനും കടൽക്ഷോഭത്തിനും സാധ്യതയുണ്ടെന്ന് ഖത്തർ കാലാവസ്ഥാ വകുപ്പ് (Qatar Meteorology Department) മുന്നറിയിപ്പ് നൽകി. വെള്ളിയാഴ്ച (ഏപ്രിൽ 10) മൂടൽമഞ്ഞോടു കൂടിയ മേഘാവൃതമായ അന്തരീക്ഷമായിരിക്കുമെന്നും, താരതമ്യേന ശാന്തമായ കാലാവസ്ഥയായിരിക്കുമെന്നും അധികൃതർ അറിയിച്ചു. വ്യാഴം, ശനി ദിവസങ്ങളിൽ മഴ ലഭിക്കാൻ കൂടുതൽ സാധ്യതയുള്ളപ്പോൾ, രാത്രി സമയങ്ങളിൽ താപനിലയിൽ നേരിയ കുറവും അനുഭവപ്പെടും.

ഇന്ന് തെക്ക്-കിഴക്ക്, വടക്ക്-കിഴക്ക് ദിശകളിൽ നിന്ന് 8 മുതൽ 18 നോട്ട് വരെ വേഗതയിൽ കാറ്റ് വീശാൻ സാധ്യതയുണ്ട്. മഴയുള്ള സമയങ്ങളിൽ ഇതിന്റെ വേഗത 28 നോട്ട് വരെ എത്തിയേക്കാം. നാളെ വടക്ക്-പടിഞ്ഞാറ്, വടക്ക്-കിഴക്ക് ദിശകളിൽ കാറ്റിന്റെ വേഗത 3 മുതൽ 13 നോട്ട് വരെയായി കുറയുമെങ്കിലും, ശനിയാഴ്ച മഴയുള്ള സമയങ്ങളിൽ വീണ്ടും 26 നോട്ട് വരെ വേഗതയിൽ ശക്തമായ കാറ്റ് വീശാൻ സാധ്യതയുണ്ട്.

എല്ലാ ദിവസങ്ങളിലും കടലിലെ തിരമാലകൾ സാധാരണയായി 2 മുതൽ 6 അടി വരെ ഉയരത്തിലായിരിക്കും. എന്നാൽ പ്രതികൂല കാലാവസ്ഥയുള്ള സമയങ്ങളിൽ തിരമാലകൾ 10 അടി വരെ ഉയരാൻ സാധ്യതയുള്ളതിനാൽ ജാഗ്രത പാലിക്കേണ്ടതാണ്.