ഖത്തർ ഇന്റർനാഷണൽ ഫുഡ് ഫെസ്റ്റിവലിന്റെ (QIFF) 2027-ലെ എഡിഷൻ ലുസൈൽ സ്റ്റേഡിയം പരിസരത്ത് വെച്ച് നടക്കും. 2027 ജനുവരി 13 മുതൽ 23 വരെയുള്ള 11 ദിവസങ്ങളിലായാണ് ഖത്തറിലെ ഏറ്റവും വലിയ ഈ ഫുഡ് ഫെസ്റ്റിവൽ നടക്കുന്നത്. ഖത്തറിലെ തനത് വിഭവങ്ങളും അന്താരാഷ്ട്ര വിഭവങ്ങളും ആസ്വദിക്കാൻ കഴിയുന്ന ഈ ഫെസ്റ്റിവൽ എല്ലാ പ്രായത്തിലുള്ളവർക്കും ഒരുപോലെ ആസ്വദിക്കാൻ സാധിക്കുന്നതാണ്. ഈ ആഘോഷത്തിലേക്കുള്ള പ്രവേശനം എല്ലാവർക്കും തികച്ചും സൗജന്യമാണ് എന്നതാണ് ഇതിന്റെ മറ്റൊരു ആകർഷണം.
ഭക്ഷണപ്രേമികൾക്കും കുടുംബങ്ങൾക്കും സുഹൃത്തുക്കൾക്കും പുതിയ രുചികൾ അറിയാനും ഒരുമിച്ച് സമയം ചിലവഴിക്കാനും ഈ ഫെസ്റ്റിവൽ മികച്ച അവസരമായിരിക്കും. എല്ലാ ദിവസവും ഉച്ചയ്ക്ക് 12:00 മണി മുതൽ അർദ്ധരാത്രി 11:59 വരെയാണ് സമയം നിശ്ചയിച്ചിരിക്കുന്നത്. ഫെസ്റ്റിവലിൽ പങ്കെടുക്കാൻ ആഗ്രഹിക്കുന്ന സ്റ്റാളുകൾക്ക് രജിസ്റ്റർ ചെയ്യാനുള്ള അവസരം ആരംഭിച്ചതായി ഒഫീഷ്യൽ QIFF പേജ് അറിയിച്ചിട്ടുണ്ട്. പുതിയ വിവരങ്ങളും കൂടുതൽ അപ്ഡേറ്റുകളും വരും ദിവസങ്ങളിൽ ഔദ്യോഗികമായി പ്രഖ്യാപിക്കുന്നതായിരിക്കും.
