ഖത്തർ എയർവേയ്‌സ് തങ്ങളുടെ വിമാന സർവീസുകളുടെ പുതുക്കിയ സമയക്രമം പ്രസിദ്ധീകരിച്ചു. 2026 മെയ് പകുതിയോടെ ദോഹയിൽ നിന്ന് ലോകമെമ്പാടുമുള്ള 120-ലധികം ലക്ഷ്യസ്ഥാനങ്ങളിലേക്കുള്ള വിമാന സർവീസുകൾ ഘട്ടംഘട്ടമായി വർദ്ധിപ്പിക്കാനാണ് പുതിയ ഷെഡ്യൂളിലൂടെ എയർലൈൻ ലക്ഷ്യമിടുന്നത്.

ഖത്തർ സിവിൽ ഏവിയേഷൻ അതോറിറ്റിയുമായി സഹകരിച്ച് സജ്ജമാക്കിയിട്ടുള്ള പ്രത്യേക ഫ്ലൈറ്റ് കോറിഡോറുകൾ (Flight corridors) വഴിയാകും ദോഹയിലേക്കും തിരിച്ചുമുള്ള എല്ലാ വിമാനങ്ങളും സർവീസ് നടത്തുകയെന്ന് കമ്പനി പുറത്തിറക്കിയ പത്രക്കുറിപ്പിൽ വ്യക്തമാക്കി. എന്നാൽ, പ്രവർത്തനപരമോ സുരക്ഷാപരമോ ആയ കാരണങ്ങളാലോ, മറ്റ് അപ്രതീക്ഷിത സാഹചര്യങ്ങളാലോ വിമാന സമയങ്ങളിൽ മാറ്റം വരികയോ സർവീസ് റദ്ദാക്കപ്പെടുകയോ ചെയ്യാൻ സാധ്യതയുണ്ടെന്നും എയർലൈൻ മുന്നറിയിപ്പ് നൽകുന്നുണ്ട്.

യാത്രക്കാർക്കുള്ള പ്രധാന നിർദ്ദേശങ്ങൾ:

വിവരങ്ങൾ അപ്ഡേറ്റ് ചെയ്യുക: പുതുക്കിയ സമയക്രമത്തിൽ ഉൾപ്പെട്ടിട്ടുള്ള ലക്ഷ്യസ്ഥാനങ്ങളിലേക്ക് നിലവിൽ ടിക്കറ്റ് ബുക്ക് ചെയ്തിട്ടുള്ള (Confirmed booking) യാത്രക്കാരെ പുതിയ യാത്രാ വിവരങ്ങൾ എയർലൈൻ നേരിട്ട് അറിയിക്കുന്നതാണ്. ഇതിനായി യാത്രക്കാർ ഖത്തർ എയർവേയ്‌സിന്റെ വെബ്‌സൈറ്റിലോ മൊബൈൽ ആപ്പിലോ നൽകിയിട്ടുള്ള തങ്ങളുടെ ഫോൺ നമ്പർ ഉൾപ്പെടെയുള്ള കോൺടാക്റ്റ് വിവരങ്ങൾ ശരിയാണെന്ന് ഉറപ്പുവരുത്തേണ്ടതുണ്ട്.

ടിക്കറ്റ് ഉറപ്പാക്കുക: യാത്ര ഉറപ്പാക്കിയ ടിക്കറ്റുകൾ (Confirmed ticket) ഇല്ലാത്തവർ യാതൊരു കാരണവശാലും വിമാനത്താവളത്തിലേക്ക് വരുന്നത് ഒഴിവാക്കണമെന്ന് അധികൃതർ കർശന നിർദ്ദേശം നൽകിയിട്ടുണ്ട്.