ഖത്തറിലെ പ്രശസ്തമായ സൂഖ് വാഖിഫിൽ മൂന്നാമത് പാകിസ്താനി മാമ്പഴ മേള (ഹംബ എക്സിബിഷൻ) ജൂലൈ 9-ന് ആരംഭിക്കുന്നു. സൂഖ് വാഖിഫിന്റെ ഈസ്റ്റേൺ സ്ക്വയറിൽ വെച്ച് നടക്കുന്ന ഈ മേള ജൂലൈ 18 വരെ പത്ത് ദിവസങ്ങളിലായിട്ടാണ് സംഘടിപ്പിച്ചിരിക്കുന്നത്. മേള നടക്കുന്ന ദിവസങ്ങളിൽ വൈകുന്നേരം 4 മണി മുതൽ രാത്രി 10 മണി വരെ പൊതുജനങ്ങൾക്ക് സന്ദർശനം നടത്താവുന്നതാണ്.

പാകിസ്താനിലെ വിവിധ പ്രദേശങ്ങളിൽ നിന്ന് പ്രത്യേകമായി ഇറക്കുമതി ചെയ്യുന്ന ചൗൻസ, അൻവർ റതോൽ, സിന്ധ്രി, ദസേരി തുടങ്ങിയ പ്രശസ്തമായ ഇനങ്ങളിൽപ്പെട്ട മാമ്പഴങ്ങൾ മേളയിൽ പ്രധാന ആകർഷണമായിരിക്കും. മാമ്പഴങ്ങൾക്ക് പുറമെ മാമ്പഴ ജ്യൂസുകൾ, ഐസ്‌ക്രീമുകൾ, മധുരപലഹാരങ്ങൾ, മറ്റ് പരമ്പരാഗത വിഭവങ്ങൾ എന്നിവയും സന്ദർശകർക്കായി ഇവിടെ ഒരുക്കുന്നുണ്ട്.

കഴിഞ്ഞ വർഷം നടന്ന മേളയുടെ രണ്ടാം പതിപ്പിൽ 60-ലധികം ഖത്തറി കമ്പനികളും പത്തിലധികം പാകിസ്താനി മാമ്പഴ കയറ്റുമതിക്കാരും പങ്കെടുത്തിരുന്നു. കൂടാതെ ഇരുപത്തിയഞ്ചിലധികം റെസ്റ്റോറന്റുകളും ഭക്ഷണശാലകളും മാമ്പഴം കൊണ്ടുള്ള വൈവിധ്യമാർന്ന വിഭവങ്ങളും മധുരപലഹാരങ്ങളും ഒരുക്കി വലിയ ജനശ്രദ്ധ പിടിച്ചുപറ്റിയിരുന്നു. ഇത്തവണയും സന്ദർശകർക്ക് മികച്ചൊരു രുചി വൈവിധ്യം തന്നെയാണ് മേള സമ്മാനിക്കുന്നത്.