ഖത്തർ കാലാവസ്ഥാ വകുപ്പിന്റെ ഏറ്റവും പുതിയ വാരാന്ത്യ കാലാവസ്ഥാ റിപ്പോർട്ട് പ്രകാരം, രാജ്യത്തെ ചില പ്രദേശങ്ങളിൽ തുടക്കത്തിൽ മൂടൽമഞ്ഞോടുകൂടിയ കാലാവസ്ഥ അനുഭവപ്പെടാൻ സാധ്യതയുണ്ട്. പകൽ സമയങ്ങളിൽ കനത്ത ചൂടും ഉയർന്ന അന്തരീക്ഷ ഈർപ്പവും തുടരുമെന്നും മുന്നറിയിപ്പുണ്ട്. വാരാന്ത്യത്തിൽ രാജ്യത്തെ താപനില 34 ഡിഗ്രി സെൽഷ്യസിനും 45 ഡിഗ്രി സെൽഷ്യസിനും ഇടയിലായിരിക്കുമെന്നാണ് പ്രതീക്ഷിക്കുന്നത്.
വെള്ളിയാഴ്ച കാറ്റിന്റെ ദിശ മാറിമാറി വീശുമെങ്കിലും, പിന്നീട് വടക്കുകിഴക്ക് അല്ലെങ്കിൽ കിഴക്ക് ദിശകളിൽ നിന്ന് 5 മുതൽ 15 നോട്ട് വരെ വേഗതയിലാകും കാറ്റ് വീശുക. എന്നാൽ ശനിയാഴ്ച തെക്കുപടിഞ്ഞാറ് അല്ലെങ്കിൽ തെക്കുകിഴക്ക് ദിശകളിൽ നിന്ന് വീശുന്ന കാറ്റ് പിന്നീട് വടക്കുകിഴക്കൻ ദിശയിലേക്ക് മാറാനും സാധ്യതയുണ്ട്. ഈ ദിവസങ്ങളിൽ കടൽ പൊതുവെ ശാന്തമായിരിക്കുമെന്നും തിരമാലകൾ 1 മുതൽ 3 അടി വരെ മാത്രമേ ഉയരുകയുള്ളൂവെന്നും കാലാവസ്ഥാ വകുപ്പ് അറിയിച്ചിട്ടുണ്ട്.
