ഖത്തറിൽ വരും ദിവസങ്ങളിൽ താപനില ഉയരുമെന്നും ശക്തമായ കാറ്റിനും കടൽക്ഷോഭത്തിനും സാധ്യതയുണ്ടെന്നും കാലാവസ്ഥാ വകുപ്പ് (QMD) മുന്നറിയിപ്പ് നൽകി. വരാനിരിക്കുന്ന വാരാന്ത്യത്തിൽ രാജ്യത്തെ താപനില 31°C മുതൽ 41°C വരെയായിരിക്കുമെന്ന് കാലാവസ്ഥാ നിരീക്ഷണ കേന്ദ്രം അറിയിച്ചു.

വെള്ളിയാഴ്ച കാറ്റിന്റെ ദിശ വടക്കുപടിഞ്ഞാറൻ മേഖലയിൽ നിന്ന് വടക്കുകിഴക്കൻ മേഖലയിലേക്ക് മാറും. പകൽ സമയത്ത് ശക്തമായ കാറ്റിന് സാധ്യതയുണ്ട്. തിരമാലകൾ 2 മുതൽ 4 അടി വരെയും ചില സമയങ്ങളിൽ 8 അടി വരെയും ഉയർന്നേക്കാം.

ശനിയാഴ്ച ആകാശം ഭാഗികമായി മേഘാവൃതമായിരിക്കുമെന്നും രാത്രിയിൽ കാലാവസ്ഥ സുഖകരമാകുമെന്നും കരുതപ്പെടുന്നു. കാറ്റിന്റെ വേഗത കുറഞ്ഞ് 5-15 നോട്ട്സ് ആയിരിക്കും. തിരമാലകൾ തുടക്കത്തിൽ 6 അടി വരെ ഉയരാമെങ്കിലും പിന്നീട് 1 മുതൽ 4 അടി വരെയായി കുറയാനാണ് സാധ്യത. കടലിൽ പോകുന്നവരും തീരദേശത്ത് താമസിക്കുന്നവരും കാലാവസ്ഥാ വകുപ്പിന്റെ നിർദ്ദേശങ്ങൾ ശ്രദ്ധിക്കണമെന്ന് അധികൃതർ അറിയിച്ചു.