ഈദ് ആഘോഷങ്ങളുടെ ഭാഗമായി മാൾ ഓഫ് ഖത്തറിൽ വൻ ജനത്തിരക്ക്. മാളിന്റെ ചരിത്രത്തിലെ തന്നെ ഏറ്റവും വലിയ ജനത്തിരക്കുകളിലൊന്നാണിത്. മേഖലയിൽ ചില പ്രതിസന്ധികൾ നിലനിൽക്കുന്നുണ്ടെങ്കിലും, ആളുകൾ ഒത്തുചേരുന്ന ഇത്തരം പൊതു ഇടങ്ങൾ നൽകുന്ന സുരക്ഷിതത്വവും ഒത്തൊരുമയുമാണ് ഇതിലൂടെ വ്യക്തമാകുന്നത്. വിവിധ രാജ്യക്കാരായ ആയിരക്കണക്കിന് ആളുകളാണ് ഷോപ്പിംഗിനും ഭക്ഷണത്തിനും ഒപ്പം 'ലൂമിന ഡ്രീം ഷോ' (Lumina Dream Show) ആസ്വദിക്കാനുമായി മാളിൽ എത്തിയത്.
മാളുകൾ ഇന്ന് വെറും ഷോപ്പിംഗ് കേന്ദ്രങ്ങൾ മാത്രമല്ലെന്നും, ആളുകൾക്ക് ഒത്തുചേരാനും ആഘോഷിക്കാനുമുള്ള മികച്ച സാമൂഹിക ഇടങ്ങളായി മാറിയെന്നും മാൾ ഓഫ് ഖത്തർ ജനറൽ മാനേജർ മൈക്കൽ ബെവർലി പ്രതികരിച്ചു. ഒട്ടേറെ കുടുംബങ്ങളും സുഹൃത്തുക്കളും ഈദിൽ ഒത്തുചേർന്നത് വലിയൊരു പ്രതീക്ഷയുടെ സന്ദേശമാണ് നൽകുന്നതെന്നും അദ്ദേഹം കൂട്ടിച്ചേർത്തു.
ഖത്തറിലെ വ്യത്യസ്ത സമൂഹങ്ങളെ ഒരുമിപ്പിക്കുന്ന 'ദ മാൾ ഓഫ് ദി നേഷൻ' (The Mall of the Nation) എന്ന ആശയത്തിനാണ് മാൾ ഓഫ് ഖത്തർ ഇപ്പോൾ മുൻഗണന നൽകുന്നത്. ഈ ഒത്തുചേരൽ അതിനുള്ള ഏറ്റവും വലിയ തെളിവാണെന്ന് അസറ്റ് മാനേജ്മെന്റ് സി.ഇ.ഒ റോണി മൗറാനി വ്യക്തമാക്കി. ഇതിന്റെ ഭാഗമായി വിവിധ രാജ്യങ്ങളുടെ സംസ്കാരങ്ങളെ ആഘോഷിക്കുന്ന 'എം.ഒ.ക്യു സ്റ്റേജ് ഓഫ് നേഷൻസ്' (MOQ Stage of Nations) എന്ന പുതിയ സാംസ്കാരിക പദ്ധതിക്കും മാൾ ഒരുങ്ങുകയാണ്.
