വിദ്യാഭ്യാസ-ഉന്നതവിദ്യാഭ്യാസ മന്ത്രാലയം (MoEHE) എല്ലാ സ്വകാര്യ സ്‌കൂളുകൾ, കിന്റർഗാർട്ടനുകൾ, വിദ്യാഭ്യാസ സേവന കേന്ദ്രങ്ങൾ, നഴ്‌സറികൾ എന്നിവയോട് മാർച്ച് 1, 2026 (ഞായറാഴ്ച) മുതൽ നേരിട്ടുള്ള ക്ലാസുകൾ നിർത്തിവെച്ച് പൂർണ്ണമായും ഓൺലൈൻ പഠനത്തിലേക്ക് (Distance Learning) മാറാൻ നിർദേശം നൽകി. മേഖലയിലെ പുതിയ സംഭവവികാസങ്ങളുടെ പശ്ചാത്തലത്തിൽ ഒരു മുൻകരുതൽ നടപടിയെന്ന നിലയിലാണ് ഈ തീരുമാനം. ഇനിയൊരു അറിയിപ്പുണ്ടാകുന്നതുവരെ ഈ രീതി തുടരും.

സ്കൂൾ ഉടമകൾ, പ്രിൻസിപ്പൽമാർ, ലൈസൻസ് ഉള്ളവർ, ഡയറക്ടർമാർ എന്നിവർക്കായി പുറത്തിറക്കിയ 2026-ലെ സർക്കുലർ നമ്പർ (2)-ലാണ് മന്ത്രാലയം ഇക്കാര്യം വ്യക്തമാക്കിയത്. വിദ്യാർത്ഥികൾ, അധ്യാപകർ, അഡ്മിനിസ്ട്രേറ്റീവ് ജീവനക്കാർ, മറ്റ് സഹായ ജീവനക്കാർ എന്നിവർക്ക് സുരക്ഷിതമായ അന്തരീക്ഷം ഉറപ്പാക്കുക എന്നതാണ് ഇതിലൂടെ ലക്ഷ്യമിടുന്നതെന്ന് മന്ത്രാലയം വ്യക്തമാക്കി.

പുതിയ തീരുമാനപ്രകാരം എല്ലാ സ്വകാര്യ സ്കൂളുകളിലും കിന്റർഗാർട്ടനുകളിലും വിദ്യാർത്ഥികളും അതുപോലെ അധ്യാപകരും മറ്റ് ജീവനക്കാരും നേരിട്ട് ഹാജരാകുന്നത് ഉടനടി നിർത്തിവെക്കേണ്ടതാണ്. പകരം, അംഗീകൃത ഇലക്ട്രോണിക് പ്ലാറ്റ്‌ഫോമുകളും വിദ്യാഭ്യാസ വെബ്‌സൈറ്റുകളും ഉപയോഗിച്ച് നിലവിലെ അക്കാദമിക് ഷെഡ്യൂളുകൾ പ്രകാരം തന്നെ ക്ലാസുകൾ തടസ്സമില്ലാതെ നടക്കുന്നുണ്ടെന്ന് എല്ലാ സ്ഥാപനങ്ങളും ഉറപ്പുവരുത്തണം.