ഖത്തറിലെ സാംസ്കാരിക കേന്ദ്രമായ കത്താറയിലെ (Katara Cultural Village) ആർട്ട് സെൻ്ററിൽ മൂന്ന് വ്യത്യസ്ത പ്രമേയങ്ങളിലുള്ള ചിത്രകലാ പ്രദർശനങ്ങൾ ആരംഭിച്ചു. ഫെബ്രുവരി 5-ന് തുടങ്ങാനിരിക്കുന്ന പ്രശസ്തമായ 'ആർട്ട് ബാസൽ ഖത്തറിനോടനുബന്ധിച്ചാണ്' (Art Basel Qatar) ഈ പ്രദർശനങ്ങൾ സംഘടിപ്പിച്ചിരിക്കുന്നത്. 2026 ഫെബ്രുവരി 28 വരെ സന്ദർശകർക്ക് ഈ പ്രദർശനങ്ങൾ ആസ്വദിക്കാനുള്ള അവസരമുണ്ടാകും.
ഈ പ്രദർശനങ്ങളിൽ പ്രമുഖരായ മൂന്ന് കലാകാരന്മാരുടെ സൃഷ്ടികളാണുള്ളത്. അൽ മർക്കിയ ഗാലറിയുമായി സഹകരിച്ച് ഖത്തർ കലാകാരി അസ്മ സമി, ദാർ ഹെസ്സ ആർട്ട് ഗാലറിയുമായി സഹകരിച്ച് ഖത്തർ കലാകാരൻ ഖാലിദ് ബൊമാത്തർ, സന ആർട്ട് ഗാലറിയുമായി സഹകരിച്ച് ഇറാനിയൻ കലാകാരി ഹൈഫ അലിസേദ എന്നിവരാണ് തങ്ങളുടെ കലാസൃഷ്ടികൾ അവതരിപ്പിക്കുന്നത്. സമകാലിക കലയുടെ വ്യത്യസ്ത തലങ്ങൾ, മാനുഷിക ആഖ്യാനങ്ങൾ, സാംസ്കാരിക വിനിമയം എന്നിവയാണ് പ്രദർശനങ്ങളുടെ പ്രധാന ആകർഷണം.
