പൊതുജനങ്ങളിൽ ആരോഗ്യകരമായ ജീവിതശൈലിയും വ്യായാമ ശീലവും പ്രോത്സാഹിപ്പിക്കുന്നതിനായി ഖത്തർ സ്പോർട്സ് ഫോർ ഓൾ ഫെഡറേഷൻ നടപ്പിലാക്കുന്ന '365 ഡെയ്‌സ് ഓഫ് ആക്ടിവിറ്റി' പദ്ധതിയുടെ ഭാഗമായി പുതിയ റണ്ണിംഗ് പരിശീലന പരിപാടിക്ക് തുടക്കമായി. അൽ റയ്യാൻ പാർക്കിൽ നടന്ന ആദ്യ സെഷനിൽ വിവിധ പ്രായക്കാരായ അറുപതിലധികം പേർ വളരെ ആവേശത്തോടെയാണ് പങ്കെടുത്തത്.
ശാരീരികക്ഷമത വർദ്ധിപ്പിക്കുന്നതിനുള്ള വിവിധ വ്യായാമങ്ങളും ഓട്ട പരിശീലനങ്ങളുമാണ് പരിപാടിയിൽ ഉൾപ്പെടുത്തിയിരുന്നത്. ഫെഡറേഷനിലെ വിദഗ്ധരായ പരിശീലകരുടെ മേൽനോട്ടത്തിൽ ഓരോരുത്തർക്കും അനുയോജ്യമായ രീതിയിലുള്ള മാർഗ്ഗനിർദ്ദേശങ്ങളും നൽകി. സമൂഹത്തിൽ കായിക വിനോദങ്ങൾ പ്രോത്സാഹിപ്പിക്കുന്നതിന്റെ ഭാഗമായി ആരംഭിച്ച ഈ സൗജന്യ പരിശീലന പരിപാടിയുടെ തുടർ സെഷനുകൾ എല്ലാ വ്യാഴാഴ്ചയും വൈകുന്നേരങ്ങളിൽ നടക്കുമെന്ന് അധികൃതർ അറിയിച്ചു.
