ഖത്തർ വ്യോമപാത അടച്ചതിനെ തുടർന്ന് ഖത്തർ എയർവേയ്സിന്റെ ഷെഡ്യൂൾ ചെയ്ത എല്ലാ വിമാന സർവീസുകളും നിർത്തിവെച്ച നിലയിൽ തന്നെ തുടരുന്നു. വ്യോമപാത സുരക്ഷിതമായി പൂർണ്ണമായും തുറന്നതായി ഖത്തർ സിവിൽ ഏവിയേഷൻ അതോറിറ്റി ഔദ്യോഗികമായി അറിയിച്ചതിന് ശേഷം മാത്രമേ സർവീസുകൾ പുനരാരംഭിക്കുകയുള്ളൂ എന്ന് കമ്പനി വ്യക്തമാക്കി. ഇത് സംബന്ധിച്ച പുതിയ വിവരങ്ങൾ മാർച്ച് 8-ന് ദോഹ സമയം രാവിലെ 9 മണിക്ക് (06:00 UTC) പുറത്തുവിടും.
സിവിൽ ഏവിയേഷൻ അതോറിറ്റിയുടെ പ്രത്യേക അനുമതിയോടെ സുരക്ഷിതമായ പാതയിലൂടെ മാർച്ച് 8-ന് ദോഹയിലെ ഹമദ് അന്താരാഷ്ട്ര വിമാനത്താവളത്തിലേക്ക് ചുരുക്കം ചില സർവീസുകൾ നടത്താൻ കമ്പനി തീരുമാനിച്ചിട്ടുണ്ട്. ലണ്ടൻ, പാരീസ്, മാഡ്രിഡ്, റോം, ഫ്രാങ്ക്ഫർട്ട്, ബാങ്കോക്ക് എന്നീ നഗരങ്ങളിൽ നിന്ന് മാത്രമായിരിക്കും ഈ വിമാനങ്ങൾ സർവീസ് നടത്തുക. ദോഹ അവസാന ലക്ഷ്യസ്ഥാനമായുള്ള (Final Destination) യാത്രക്കാർക്ക് മാത്രമേ ഈ വിമാനങ്ങളിൽ യാത്ര ചെയ്യാൻ സാധിക്കൂ. ഖത്തർ എയർവേയ്സിന്റെ വെബ്സൈറ്റ് (qatarairways.com), മൊബൈൽ ആപ്പ് അല്ലെങ്കിൽ ട്രാവൽ ഏജന്റുമാർ വഴി ടിക്കറ്റുകൾ ബുക്ക് ചെയ്യാവുന്നതാണ്.
ഈ പരിമിതമായ സർവീസുകൾ വിമാന സർവീസുകളുടെ പൂർണ്ണമായ പുനരാരംഭിക്കലായി കണക്കാക്കാനാവില്ലെന്ന് എയർവേയ്സ് മുന്നറിയിപ്പ് നൽകി. അതിനാൽ, കൺഫോം ചെയ്ത ടിക്കറ്റുകൾ ഇല്ലാത്തവർ വിമാനത്താവളങ്ങളിലേക്ക് വരുന്നത് ഒഴിവാക്കണം. യാത്രക്കാരുടെയും ജീവനക്കാരുടെയും സുരക്ഷയ്ക്കാണ് തങ്ങൾ എപ്പോഴും മുൻഗണന നൽകുന്നതെന്നും, തങ്ങളുടെ നിയന്ത്രണത്തിലല്ലാത്ത ഈ അപ്രതീക്ഷിത സാഹചര്യത്തിലുണ്ടായ ബുദ്ധിമുട്ടുകളിൽ നിർവ്യാജം ഖേദിക്കുന്നതായും കമ്പനി വാർത്താക്കുറിപ്പിൽ അറിയിച്ചു.
