ഖത്തർ എയർവേയ്‌സ് 2025ൽ അതിന്റെ ആസ്ഥാനം ദോഹയിലെ മശൈരിബ് ഡൗൺടൗണിലേയ്ക്ക് മാറ്റാൻ തീരുമാനിച്ചു. എയർലൈനിൻ്റെ നിലവിലെ ആസ്ഥാനത്ത് നടന്ന സംയുക്ത ഒപ്പിടൽ ചടങ്ങിൽ മഷീറബ് പ്രോപ്പർട്ടീസ് ഡയറക്ടർ ബോർഡ് വൈസ് ചെയർപേഴ്‌സൺ സാദ് അൽ മുഹന്നദിയുടെ സാന്നിധ്യത്തിലായിരുന്നു പ്രഖ്യാപനം.

പുതിയ ആസ്ഥാനം നവീനതയെ പ്രോത്സാഹിപ്പിക്കുകയും പ്രവർത്തനക്ഷമത വർദ്ധിപ്പിക്കുകയും ചെയ്യുമെന്നും അതിലൂടെ എയർലൈൻ കമ്പനിയുടെ തുടർച്ചയായ വളർച്ച ഉറപ്പാക്കുമെന്നും ഖത്തർ എയർവേയ്‌സ് ഗ്രൂപ്പ് ചീഫ് എക്സിക്യൂട്ടീവ് ഓഫിസർ ബദർ അൽ മീർ വ്യക്തമാക്കി.

പുതിയ ആസ്ഥാനം 51,602 ചതുരശ്ര അടി വിസ്തൃതിയിലാണ് വ്യാപിക്കുന്നത്. 4 ടവറുകൾ ഒരു കേന്ദ്ര ലോബിയിലൂടെ ബന്ധിപ്പിച്ചാണ് നിർമ്മിക്കുന്നത്. ടവർ എ 20 നിലകൾ, ടവർ ബി 15 നിലകൾ, ടവറുകൾ സി, ഡി ഓരോന്നും 6 നിലകളുള്ളതാണ്. ഹമദ് ഇന്റർനാഷണൽ എയർപോർട്ടിൽ നിന്ന് 9 കിലോമീറ്റർ മാത്രം ദൂരത്തിൽ സ്ഥിതി ചെയ്യുന്നതിനാൽ സുതാര്യമായ ഗതാഗത സൗകര്യത്തിന് അനുയോജ്യമായ സ്ഥലമായിരിക്കും. കൂടാതെ മശൈരിബ് മേഖലയിൽ ഏറ്റവും ഉയർന്ന കെട്ടിടമായി പണിയുന്നതിനാൽ ദോഹയുടെ മനോഹര ദൃശ്യങ്ങൾ കാണാൻ സാധിക്കുന്നു.

എയർലൈൻ ജീവനക്കാർക്ക് വൈവിധ്യമാർന്ന സൗകര്യങ്ങൾ ഉറപ്പാക്കും. മശൈരിബ് മെട്രോ സ്റ്റേഷന്റെ സമീപം സ്ഥിതിചെയ്യുന്നതിനാൽ ഖത്തർ എയർവേയ്‌സ് ടീമുകൾക്ക് മികച്ച ഗതാഗത സൗകര്യം ലഭ്യമാകും. നഗരമൊട്ടാകെ കണക്റ്റിവിറ്റിയും പ്രോത്സാഹിപ്പിക്കുന്ന സ്ഥലം കൂടിയാണിത്.